Worteletruuj 2012 naor Boeken Steunen Mensen

Dinsdaag 14 fibberwarie 2012 um 20.00 oor in ’T RAODHOES

De hoëge Bliërickse vastelaovesónderscheiding ‘De Worteletruuj 2012’ is toegekind aan de Stichting Boeken Steunen Mensen.

Det haet de ‘Worteletruuj’-sjurie beslaote.

Boeken Steunen Mensen haet al 25 kier de jaorlikse beuk- en platebeurs georganiseerd. De ierste veer jaor in de parterre van ’t monumentale Venlose stadhoës, daornao in ’t gebouw van Gilde Opleidinge aan de Laaghuissingel in Venlo en sinds 2008 in ’t Blariacumcollege in Bliërick.

De jaorlikse boekebeurs (waorop ouk geluuds- en beelddragers aan de man waere gebracht) is ’t resultaat van ’n samewerking tösse de Rotary Venlo, Piël en Maas en de Vincentiusvereiniging. Doel is um geld in te zamele veur kleinschaolige projekte veur verbaetering van de kanserme jeug in de Derde Wereld. Tiedes de ierste beurs woort 5000 euro ingezameld, inmiddels is det haos 60.000 euro. De aafgeloupe 25 jaor woort in totaal 650.000 euro oëtgekierd aan 56 projekte in 23 lande.

De ‘Worteltruuj’-sjurie haet beej eur beslissing zwaor laote meiwaege det de stichting dök projekte in de Derde Wereld bereik via Venlose kanale.

  de bouw van ’n kleine schoël begeleide.

De sjurie hech d’raan te benaodrökke dat ze neet allein de Rotary Venlo, Maas en Piel en de Vincentiusvereiniging in ’t zonnetje wil plaatse. De jaorlikse boekebeurs wuurt veural meugelik gemak door de 32 vreejwilligers die waek in-waek oët in de alde drökkeriej van ’t Missiehoës in Steyl de aangeboje beuk (200.000 per jaor) selektere. Ouk zoel de boekebeurs noëit zo’n enorm finansjeel sukses kinne zien as neet zoëvuuël vreejwilligers, zo’n 150 persoëne, tiedes de beursdaag de hendjes zoele laote wappere. Daorum ’n spesjale iervolle vermelding veur de vreejwilligers van Boeken Steunen Mensen. Daorvan zölle d’r zeker de kómende editie, op 6, 7 en 8 jannewarie 2012, weer vuuële present zien.   

Dit jaor vindt ’t Groët Gala Worteletruuj plaats op dinsdag 14 fibberwarie um 20.00 oor in ’t Raodhoës.

‘De Worteletruuj’ wuurt idder jaor toëgekind aan persoëne die zich verdeenstelik hebbe gemak op lokaal, regionaal en/of landelik gebied. De liës van laureate is langk en is te vinde op de website van Vastelaovesgezelschap 'de Wortelepin', www.wortelepin.nl. De oëtreiking is ’n initiatief van ’t Fonds Sociale Projekte van ’t Bliëricks Vastelaovesgezelschap 'de Wortelepin' . De ónderscheiding wuurt oëtgereik tiedes ’t Groët Gala Worteletruuj. Sinds twië jaor is det gala met vuuël sukses in ’n niej jeske gegaote. De opbrings van ’t gala geit naor ’n good doel. Det doel zal in euverleg met de Stichting Boeken Steunen Mensen waere bepaold.